ਵਿਸ਼ਵ ਪੰਜਾਬੀ ਸਾਹਿਤ ਅਕਾਦਮੀ (ਵਿਪਸਾਅ), ਕੈਲੀਫ਼ੋਰਨੀਆ ਵਿੱਚ ਪੰਜਾਬੀ ਸਾਹਿਤ ਅਤੇ ਬੋਲੀ ਨੂੰ ਪ੍ਰਣਾਈ ਹੋਈ ਉੱਤਰੀ ਅਮਰੀਕਾ ਦੀ ਪ੍ਰਮੁੱਖ ਸਾਹਿਤਕ ਸੰਸਥਾ ਹੈ। ਸਾਡਾ ਮੁੱਖ ਟੀਚਾ ਪੰਜਾਬੀ ਸਾਹਿਤ ਦੀ ਰਚਨਾ, ਵਿਕਾਸ ਅਤੇ ਸੰਭਾਲ ਲਈ ਕੰਮ ਕਰ ਰਹੇ ਲੇਖਕਾਂ, ਕਲਾਕਾਰਾਂ ਅਤੇ ਸਾਹਿਤ ਪ੍ਰੇਮੀਆਂ ਨੂੰ ਇਕ ਜਗ੍ਹਾ ਇਕੱਠਾ ਕਰਕੇ ਸਾਂਝੇ ਹੰਭਲੇ ਦੀ ਤਾਕਤ ਸਦਕਾ ਸਾਹਿਤ ਅਤੇ ਬੋਲੀ ਦੇ ਖੇਤਰ ਵਿੱਚ ਪਾਏ ਜਾ ਰਹੇ ਯੋਗਦਾਨ ਵਿੱਚ ਹੋਰ ਵਾਧਾ ਕਰਨਾ ਹੈ। ਅਕਤੂਬਰ 2002 ਵਿੱਚ ਕੈਲੀਫ਼ੋਰਨੀਆ ਦੀਆਂ ਕਈ ਸਾਹਿਤ ਸਭਾ ਇਕਾਈਆਂ ਦੇ ਮੈਂਬਰਾਂ ਵੱਲੋਂ ਰਲ ਕੇ ਵਿਪਸਾਅ ਦੀ ਸਥਾਪਨਾ ਕੀਤੀ ਗਈ।   ਇਸਦੀ ਪਹਿਲੀ ਬੈਠਕ ਪੰਜਾਬੀ ਸ਼ਾਇਰ ਸੁਰਜੀਤ ਪਾਤਰ ਦੀ ਸਰਪ੍ਰਸਤੀ ਹੇਠ ਸਾਨ ਫ੍ਰਾਂਸਿਸਕੋ ਦੇ ਨਜ਼ਦੀਕ ਐਮਰੀਵਿੱਲ ਸ਼ਹਿਰ ਸ਼ੈਰੇਟਨ ਹੋਟਲ ਵਿੱਚ ਹੋਈ ਜਿਸ ਵਿੱਚ ਕੈਲੀਫ਼ੋਰਨੀਆ ਦੇ ਸਾਰੇ ਨਾਮਵਰ ਲੇਖਕਾਂ ਨੇ ਹਿੱਸਾ ਲਿਆ ਸੀ। ਵਿਪਸਾਅ ਦੀ ਸੰਸਥਾਪਨਾ ਅਤੇ ਨਾਮਕਰਨ ਵਿੱਚ ਡਾ ਜਗਤਾਰ ਜੀ ਅਤੇ ਪਦਮ ਸ਼੍ਰੀ ਸੁਰਜੀਤ ਪਾਤਰ ਜੀ ਨੇ ਖ਼ਾਸ ਦਿਲਚਸਪੀ ਲਈ ਸੀ। ਉਸ ਦਿਨ ਤੋਂ ਵਿਪਸਾਅ ਅਤੇ ਇਸਦੇ ਸਮੂਹ ਮੈਂਬਰ ਪੰਜਾਬੀ ਸਾਹਿਤ ਅਤੇ ਮਾਂ ਬੋਲੀ ਦੇ ਪ੍ਰਸਾਰ ਲਈ ਤਨੋ- ਮਨੋਂ ਯੋਗਦਾਨ ਪਾ ਰਹੇ ਹਨ। ਹਰ ਮਹੀਨੇ ਸਾਹਿਤਕ ਬੈਠਕਾਂ ਆਯੋਜਿਤ ਹੁੰਦੀਆਂ ਹਨ, ਬਾਹਰੋਂ ਆਏ ਲੇਖਕਾਂ ਲਈ ਵਿਸ਼ੇਸ਼ ਸਾਹਿਤਕ ਸਮਾਗਮ ਕਰਾਏ ਜਾਂਦੇ ਹਨ, ਅਤੇ ਹਰ ਸਾਲ ਸਾਲਾਨਾ ਕਾਨਫ਼ਰੰਸ ਕਰਾਈ ਜਾਂਦੀ ਹੈ ਜਿਸ ਵਿੱਚ ਦੇਸ਼ ਵਿਦੇਸ਼ ਤੋਂ ਪੰਜਾਬੀ ਲੇਖਕ ਅਤੇ ਕਲਾਕਾਰ ਸ਼ਾਮਲ ਹੁੰਦੇ ਹਨ। ਪ੍ਰਕਾਸ਼ਨ ਅਤੇ ਸੰਪਾਦਨਾ ਦੇ ਖੇਤਰ ਵਿੱਚ ਵਿਸ਼ਵ ਪੰਜਾਬੀ ਸਾਹਿਤ ਸੰਗ੍ਰਹਿ ਦੇ ਨਾਮ ਹੇਠ 6 ਅੰਕ ਸੰਪਾਦਿਤ ਕੀਤੇ ਗਏ ਹਨ ਅਤੇ 2 ਭਾਗ ਉੱਤਰ ਅਮਰੀਕੀ ਪੰਜਾਬੀ ਕਵਿਤਾ ਦੇ ਵੀ ਛਪੇ ਹਨ। ਪੰਜਾਬੀ ਸਾਹਿਤ ਨਾਲ ਜੁੜਿਆ ਹੋਇਆ ਕੋਈ ਵੀ ਪੰਜਾਬੀ ਪਿਆਰਾ ਵਿਪਸਾਅ ਨਾਲ ਜੁੜ ਸਕਦਾ ਹੈ ਪਰ ਕੈਲੀਫ਼ੋਰਨੀਆ ਰਹਿੰਦੇ ਲੇਖਕ, ਅਤੇ ਕਲਾਕਾਰ ਇਸਦੇ ਮੈਂਬਰ ਬਣ ਕੇ ਸਥਾਨਕ ਬੈਠਕਾਂ ਵਿੱਚ ਹਿੱਸਾ ਲੈ ਸਕਦੇ ਹਨ। ਤੁਸੀਂ ਵੀ ਵਿਪਸਾਅ ਨਾਲ ਜੁੜਨ ਲਈ VIPSA.CA@gmail.com ਤੇ ਸੰਪਰਕ ਕਰੋ।